Dit is voorwaar my eer en voorreg om u as mede-Afrikaners en kultuur liefhebbers na die 17de Kalfiefees in Hermanus te verwelkom.

Afrikaans as taal en kultuur-drywer lê my na aan die hart.  Dit is my moedertaal, my denk taal, my hartstaal en my sielstaal.  Dit is die instrument en kultuur wat my van kindsbeen by bly en my op die wandelpaadjie na sukses lei.  Hulle sê Afrikaans is groot, maar ek dra dit saam met my waar ookal ek mag gaan.

Dit is met hierdie uitgangspunt dat ek al die geesdriftige Kalfiefees-ondersteuners ‘n aangename en verreikende ervaring toewens.

Ek wil ook my opregte dank aan die organiseerders, borge, sakevennote, plaaslike bydraers en belanghebbendes betuig – vir die pogings wat aangewend is om te verseker dat Hermanus weereens in staat is om Suid-Afrika se kreatiewe aanbiedinge so skouspelagtig aan te bied.

Ons sien uit daarna om u tussen 9 en 13 Augustus 2017 saam met die walviskalfies, in ons idilliese kusdorp te verwelkom vir nog ‘n indrukwekkende  vertoning van ons land se beste vermaaklikheidstalent.

Rudolph Smith
Uitvoerende Burgemeester:  Overstrand